Мицкоски: Ние сме соседи со Србија, но мене ме интересира Македонија и се надевам во иднина да имаме добрососедски односи

Премиерот Христијан Мицкоски вели дека телефонскиот разговор со Срдановиќ, носителот на листата што победи на изборите во Србија, бил протоколарен и дека очекува подобрување на економската соработка меѓу двете соседни држави.

— реклама —

Во гостувањето во „Само интервју“ на телевизија „Канал 5“, Мицкоски појасни дека со Срдановиќ се слушнал околу пладне и дека не очекувал од разговорот да прави јавен настан.

— реклама —

Тој рече дека не го познава лично Срдановиќ, но изрази надеж дека во иднина Македонија и Србија ќе ги унапредат добрососедските односи, особено во економијата.

„Ценам дека сегашниот потенцијал можеме да го зголемиме уште повеќе“, истакна Мицкоски.

— реклама —

На прашањето дали разговарал со српскиот претседател Александар Вучиќ за изборите и односите со сестринската партија во Србија, премиерот одговори дека неговиот приоритет се Македонија и ВМРО-ДПМНЕ.

Тој додаде дека ВМРО-ДПМНЕ одржува односи со сестрински партии во Европа, меѓу кои ХДЗ, ГЕРБ и ЦДУ/ЦСУ, и дека партијата е подготвена да помогне кога тоа ќе биде побарано. Мицкоски посочи дека засега не разговарал со Вучиќ, но не ја исклучи можноста за средба и разговор во рамките на Европската народна партија.