Нови можности за инвестиции во Македонија и продлабочување на стратешкото партнерство со САД биле во фокусот на серијата средби што премиерот Христијан Мицкоски и владината делегација ги оствариле во Вашингтон со претставници на американските институции, Конгресот и економскиот сектор.
Мицкоски се сретнал со Caroline Vik, главен директор за политики и вршител на должноста главен директор за развој во Американската корпорација за меѓународно финансиско развивање – DFC. На средбата биле разгледани можностите за продлабочување на соработката и потенцијални инвестиции во Македонија, особено во енергетиката, високите технологии и други стратешки области.
DFC располага со инвестициски капацитет од 205 милијарди долари и претставува инструмент на САД за мобилизирање приватен капитал и инвестиции во стратешки сектори. Во своето работење посебно внимание посветува на енергетиката, современата инфраструктура и напредните технологии.
Во Вашингтон Мицкоски остварил и повеќе политички средби со претставници на американскиот Конгрес.
На средбата со конгресменот Keith Self, претседател на Поткомитетот за Европа во Комитетот за надворешни работи на Претставничкиот дом на САД, било разговарано за стратешкото партнерство меѓу Македонија и САД, заедничките интереси и можностите за дополнително продлабочување на соработката.
Премиерот се сретнал и со конгресменката Claudia Tenney, копретседавач на Македонската група за пријателство во Конгресот на САД. Во фокусот биле традиционално силните и пријателски односи меѓу двете држави, како и значењето на парламентарната соработка, политичкиот дијалог и размената на искуства.
Од владината делегација оценуваат дека средбите во Вашингтон се дел од заложбите за зајакнување на стратешкото партнерство со САД и негово претворање во конкретна економска соработка, нови инвестиции и проекти од интерес за Македонија.
Посветеноста кон унапредување на партнерството, заедничките вредности и градењето стабилни и долгорочни македонско-американски односи, како што е наведено, остануваат важен темел на соработката меѓу двете држави.
