Мицкоски од Вашингтон: Европската интеграција мора да се темели на реформи и заслуги, Македонија нема да чека- економијата мора да оди напред

Премиерот Христијан Мицкоски од Вашингтон порача дека Македонија останува посветена на членството во Европската Унија, но дека европската интеграција треба да се темели на реформи, заслуги и предвидлив процес. Во меѓувреме, како што истакна, земјата нема да чека, туку ќе продолжи со економскиот развој, инфраструктурните инвестиции и реформите.

Мицкоски ова го истакна во обраќањето пред Атлантскиот совет, каде ги претстави стратешките приоритети на Владата, односите со Соединетите Американски Држави, позицијата на Македонија во регионот, европската интеграција и плановите за развој на инфраструктурата, енергетиката и високите технологии.

Премиерот оцени дека стратешкото партнерство со САД се гради со децении и посочи дека Владата има определба дополнително да го продлабочува. Според него, геостратешката положба на Македонија во срцето на Балканот создава можности земјата да биде значајна транспортна и енергетска крстосница.

— реклама —

Во однос на членството во НАТО, Мицкоски нагласи дека државата ќе продолжи со исполнување на преземените обврски, вклучително и постепено зголемување на издвојувањата за одбраната. Паралелно, како што посочи, ќе продолжат инвестициите во стратешката инфраструктура, автопатите, железницата и енергетските преносни системи.

Како важен дел од развојната агенда ја посочи и сајбер-безбедноста. Владата планира изградба на примарен центар за податоци кој ќе ги поврзува јавните институции, ќе биде поврзан со постојниот секундарен центар за обновување на податоци и дополнително ќе биде обезбеден преку клауд инфраструктура.

— реклама —

Развојната стратегија, според Мицкоски, се темели на три поврзани столба – инфраструктура, енергетика, како и вештачка интелигенција и висока технологија.

Во енергетскиот сектор, тој ја истакна амбицијата Македонија да стане значајна енергетска и транзитна крстосница на Балканот. Интерконекторот со Грција треба да овозможи поврзување со ЛНГ терминалот во Александрополис, додека интерконекторот со Србија би создал можност енергетскиот правец да продолжи кон Централна Европа.

Мицкоски се осврна и на Коридорите 8 и 10, нагласувајќи дека нивното значење е економско, но и стратешко и безбедносно. Според него, инфраструктурното поврзување може да има значајна улога и во идната реконструкција на Украина.

— реклама —

Говорејќи за европската интеграција, премиерот посочи дека Македонија повеќе од две децении е на европскиот пат и дека во изминатиот период биле направени бројни отстапки во име на европската перспектива. Тој оцени дека процесот треба да биде попредвидлив и да се заснова на исполнување на реформите и заслугите на земјите кандидати, без постојано отворање нови билатерални услови.

Во исто време, Мицкоски порача дека Владата ќе продолжи со реформите, зајакнувањето на владеењето на правото, привлекувањето странски инвестиции и развојот на високотехнолошката индустрија, независно од динамиката на европскиот процес.

— реклама —

Како аргумент за економските резултати тој го посочи растот од 4,3 проценти во вториот квартал, оценувајќи дека Македонија е меѓу земјите со највисок економски раст во Европа.

Мицкоски најави дека Владата ќе продолжи да разговара со европските партнери и со САД за предизвиците со кои се соочува земјата, при што стратешките определби, како што истакна, остануваат непроменети – продлабочување на партнерството со САД и полноправно членство во Европската Унија.

Од Вашингтон, премиерот порача дека паралелно со европските интеграции Македонија ќе продолжи да работи на сопствениот развој преку модерна инфраструктура, енергетско поврзување, дигитализација, сајбер-безбедност, инвестиции, вештачка интелигенција и висока технологија.