Мицкоски повикан во суд: На 9 октомври ќе сведочи по тужбата за клевета на Ленче Ристоска

Премиерот и претседател на ВМРО-ДПМНЕ, Христијан Мицкоски, ќе добие судска покана да се појави на 9 октомври во Граѓанскиот суд во Скопје, каде што треба да биде сослушан како странка во постапката по тужбата за клевета и навреда што ја поднесе поранешната јавна обвинителка Ленче Ристоска против владејачката партија.

Одлуката ја донесе судијката Љубица Колиќ на денешното подготвително рочиште, откако го прифати барањето на полномошникот на Ристоска, адвокатот Лазе Сандев. Како актуелен законски застапник на партијата, Мицкоски ќе биде повикан да даде исказ, а поканата ќе му биде доставена на адресата на седиштето на ВМРО-ДПМНЕ.

— реклама —

Ристоска ја тужи партијата поради соопштение објавено во февруари минатата година, во кое беше наречена „партиска испостава на СДС и ДУИ“ и „симбол на моралниот пад на обвинителството“, додека во текстот беше наведено и дека „отсуството на срам е одлика на вакви луѓе“.

— реклама —

Адвокатот на ВМРО-ДПМНЕ, Ружица Николовска, пред судот оцени дека сослушувањето на Мицкоски е нецелисходно, но конечната одлука ја остави на судот. Во одговорот на тужбата, партијата наведува дека соопштението претставува отворање дебата за прашања од јавен интерес, поврзани со бонусите и работењето на поранешното Специјално јавно обвинителство.

Од друга страна, адвокатот Сандев истакна дека не станува збор за критика насочена кон институција, туку за индивидуализирани и недокажани тврдења насочени кон Ристоска, која во тој период ги водеше предметите „Талир 1“ и „Талир 2“ против ВМРО-ДПМНЕ.

— реклама —

Ристоска бара надомест на нематеријална штета во висина од 300 илјади денари – по 150 илјади денари за навреда и за клевета.

Таа во меѓувреме поднесе оставка од функцијата јавен обвинител, откако ѝ беа одземени предметите „Талир“, а претходно побара и заштита од Советот на јавни обвинители поради јавни изјави на Мицкоски, кој, без да ја именува, ја нарече „медиокритет“ и дел од „клиентелистичко-политичка матрица“. Советот тогаш оцени дека нема докази за притисок врз обвинителката.

Во меѓувреме, предметите „Талир“ остануваат во судска постапка, при што еден од нив застарува во август годинава.