Мицкоски уверува на стабилна зима со стабилно снабдување на енергенси и без осцилации во цените

Премиерот Христијан Мицкоски уверува дека Македонија ја очекува стабилна зима со сигурно снабдување со електрична енергија, гас и нафтени деривати, без значителни осцилации во количините и цените.

Одговарајќи на новинарски прашања по пуштањето во употреба на реновираната зграда на Клиниката за неврофизиологија, Мицкоски рече дека Владата работи на тоа од јануари цената на електричната енергија да биде пониска или да продолжи примената на евтината тарифа.

— реклама —

„Сакам да ги уверам граѓаните дека ќе имаме стабилна зима, со стабилно снабдување на енергенси, без осцилации во цената или количината“, рече Мицкоски.

Тој посочи дека акумулациите се на околу 50 отсто, додека ремонтите во термоенергетските постројки се при крај. Според временската прогноза што ја посочи премиерот, грејната сезона се очекува да започне меѓу 2 и 5 ноември, а до тогаш, како што рече, подготовките ќе бидат завршени.

Мицкоски нагласи и дека е потпишан договорот со Косово за јаглен, со кој, според него, значително ќе се намали цената на произведениот мегават-час електрична енергија во домашните производни капацитети.

— реклама —

„Вода имаме. Од аспект на грејната сезона и количините на електрична енергија, не очекувам турбуленции. Очекувам најмалку иста состојба како сега, да немаме никакво покачување или скокови“, рече премиерот.

Во однос на гасот, Мицкоски смета дека во Европа може да дојде до значително зголемување на цената, дури и двојно или тројно, но не очекува тоа да предизвика големи последици во Македонија.

— реклама —

Како причина го посочи фактот дека земјава не е голем потрошувач на гас и дека најчесто се користат когенеративни постројки, кои истовремено произведуваат топла вода и електрична енергија, со што се намалуваат влезните трошоци.

За нафтата и нафтените деривати, премиерот рече дека се прават дополнителни пресметки, но дека веќе се преземени мерки. Тој посочи на пониските акцизи и прогласената кризна состојба, за кои оцени дека придонеле цените на бензините да бидат пониски и до половина евро за литар во споредба со соседните земји во регионот.

Мицкоски додаде дека поради пониските цени е зголемен и прометот на одредени бензински станици, особено во пограничните подрачја.

— реклама —

Тој уверува дека количини на нафтени деривати има доволно, продуктоводот е полн, а државните резерви се на солидно ниво.

„Не гледам во овој момент можност и причина за стравување во текот на зимата. Загрижен сум за тоа – до кога сето ова ќе трае и на тоа прашање никој во светот не може да даде одговор, до кога ќе трае кризата“, рече Мицкоски.