„Милиони за прскање без доказ дека делува - исти фирми и средства, сѐ поголем проблем со комарците“, велат од Левица

Дезинсекцијата против комарци со години се спроведува со значителни јавни средства, но според соопштението на Левица, институциите не обезбедуваат доволно јасни и мерливи податоци за тоа колкав е ефектот од потрошените пари.

Од партијата посочуваат дека само во три јавно документирани циклуси на третирање во Скопје, за периодите 2020–2021, 2022–2023 и актуелниот договор, се издвоени околу 2,75 милиони евра. Во оваа сума не се вклучени другите години, ниту средствата што ги издвојуваат општините.

— реклама —

„По толкава потрошувачка, јавноста нема серија споредливи извештаи што ќе покажат дека на конкретна локација имало мерлив ефект“, велат од Левица.

Како дополнителен проблем го посочуваат и повторувањето на истите изведувачи низ повеќегодишните договори. Според партијата, „Приматекс Бранка“ и „Аероклуб Скопје“ се појавуваат во договори во повеќе години.

— реклама —

Од Левица бараат да се објават податоците за мерењето на ефикасноста на третманите. Потсетуваат дека Министерството претходно посочило дека Институтот за јавно здравје, заедно со центрите за јавно здравје, ја следи ефикасноста и ја утврдува соодветноста на употребените средства.

Партијата прашува дали постојат теренски податоци, мониторинг на претходните третмани, испитувања на успешноста и податоци за бројноста и локалитетите на комарците. Доколку такви мерења постојат, бараат тие да бидат јавно објавени, а доколку не постојат, бараат објаснување како се одобрувале елаборати и се трошеле јавни средства без соодветна проверка на ефектот.

Левица се осврнува и на изјавата на министерот за здравство Азир Алиу дека терестичкото прскање во Драчево било поефикасно од авионското. Од партијата прашуваат врз основа на каква анализа со години се издвојуваат средства и за авионска дезинсекција и каде е споредбата меѓу двата пристапа.

— реклама —

Според нив, потребни се податоци за реално третираните површини, траекториите на летовите, дозирањето, условите при третманите, како и споредба на резултатите од авионското и терестичкото прскање.

Левица бара воспоставување задолжителен национален протокол за мерење на ефектот од дезинсекцијата. Пред и по секој третман, според нив, треба да се следи бројноста на комарците на исти контролни точки, а резултатите да се објавуваат јавно според општина, локалитет, препарат и метод на третирање.

— реклама —

Дополнително, бараат редовно да се испитува чувствителноста на комарците на активните материи што се користат, како и однапред да се утврди минимален праг на ефикасност под кој одреден третман би се сметал за неуспешен.

„Проблемот веќе не е само колку пати и дали навремено се прскало. Проблемот е што државата со години совршено знае колку чини прскањето, а не покажува колку вреди“, велат од Левица.