Минатата година имало околу 1.000 нови случаи на рак на дојка, на Онкологија се лекуваат 7.000 пациенти

Зголемениот број пациенти и потребата од полесен пристап до терапијата се меѓу причините поради кои се работи на децентрализација на онколошката грижа. На Клиниката за радиотерапија и онкологија во моментов се лекуваат околу 7.000 пациенти, а минатата година биле регистрирани околу 5.300 нови пациенти со различни видови канцер.

Податоците беа соопштени на настанот „Појадок со Хема-Онко“, каде што се разговараше за подобрување на условите и грижата за онколошките пациенти.

— реклама —

Директорот на Клиниката, проф. д-р Игор Стојковски, информираше дека во изминатиот период се воведени нови лекови, особено за пациентите со рак на дојка. Во 2025 година биле дијагностицирани околу 1.000 нови случаи на рак на дојка.

Децентрализацијата засега се спроведува преку специјалистичко-консултативна дејност во ГОБ „8 Септември“, а планот е онколози од Скопје да работат и во Клиничката болница во Битола. Во следните фази се разгледува и воведување дневни болници, зависно од инфраструктурните услови и подготвеноста на здравствените установи.

— реклама —

Стојковски нагласи дека секое проширување на услугите мора да биде проследено со соодветен кадар и инфраструктура за безбедно примање на терапијата.

Според податоците од Клиниката, бројот на нови пациенти годишно се зголемува за околу 200 до 300, додека во текот на една година на Клиниката се јавуваат околу 20.000 пациенти.

— реклама —

Од „Хема-Онко“ посочија дека целта на децентрализацијата е пациентите да добиваат безбедна и редовна терапија поблиску до своите домови. Ана Марјановиќ нагласи дека со дигитализација и онлајн одлучување мултидисциплинарните тимови би можеле да носат одлуки и за пациентите кои се лекуваат во други здравствени центри.

Од годинава функционира и тумор-борд за пациентките со рак на дојка, преку кој мултидисциплинарен тим го утврдува понатамошниот тек на лекувањето.

— реклама —

На средбата беше посочен и проблемот со долгото чекање за дијагностички прегледи. Пациент изјави дека за ПЕТ-скен се чека од четири до пет месеци, а за резултат од компјутерска томографија еден до два месеца.

Подобрата достапност до дијагностика, навременото обезбедување терапија и растоварувањето на Клиниката остануваат меѓу главните предизвици за онколошките пациенти.