Пациенти на Клиниката за онкологија реагираат дека подолг период недостигаат повеќе терапии, а дел од нив велат дека со недели чекаат информација кога лековите повторно ќе бидат достапни.
До „Скопје1“ се обратија пациенти кои тврдат дека во моментов недостигаат најмалку четири препарати – „рибоциклиб“, „фулвестрант“, „капецитабин“ и „пазопаниб“.
Една пациентка посочува дека недостатокот трае повеќе месеци и дека онколошките пациенти се оставени во неизвесност.
„Повеќе од пет терапии сигурно недостигаат веќе подолго време, повеќе месеци. Наводно по 1 септември, но тоа е долг период онколошки пациент да не прима терапија“, вели таа во порака до „Скопје1“.
Друга пациентка побара од редакцијата да се обрати до Клиниката и Министерството за здравство конкретно за „капецитабин“, терапија што ја користат и пациенти со рак на дебелото црево.
„Минатата недела немаше, ни рекоа оваа недела ќе ни се јават и ништо. Бевме денес и ни рекоа дека најверојатно од следна недела. И така неделите си поминуваат, а најзагрозените си чекаат и никој не одговара“, наведува пациентката.
Директорот на Клиниката за онкологија, Игор Стојковски, за „Скопје1“ потврди дека испораката на препарати доцни, но вели дека причината е ненавремената испорака од дистрибутерите.
„Испораката на сите наведени препарати доцни поради ненавремена испорака од страна на дистрибутерите“, вели директорот.
Според него, „капецитабин“ се очекува да пристигне утре, додека „рибоциклиб“, „фулвестрант“ и „пазопаниб“ треба да бидат доставени во текот на следната недела.
„Клиниката навремено ги изврши нарачките, а до дистрибутерите е испратено соодветно укажување во врска со доцнењето и можните последици од ненавремената испорака“, додава директорот.
Реакциите на пациентите, сепак, покажуваат дека за нив најголем проблем останува периодот без терапија и неизвесноста околу тоа кога точно ќе можат повторно да ја примаат пропишаната терапија.
