Министерот за земјоделство, шумарство и водостопанство, Борче Серафимовски, оствари работна средба со амбасадорот на Европската Унија во Македонија, Михалис Рокас, на која беше разговарано за тековните реформи во земјоделскиот сектор, искористувањето на европските фондови и продлабочувањето на соработката со Европската Унија.
Во фокусот на разговорите беа усогласувањето на домашното законодавство со европските стандарди во земјоделството и руралниот развој, како и прашањата поврзани со безбедноста на храната и фитосанитарната политика.
Министерот Серафимовски истакна дека европската интеграција во земјоделството претставува можност за зајакнување на институциите, воведување повисоки стандарди и зголемување на конкурентноста на домашното производство.
„Нашата цел е европската поддршка да се претвори во конкретни и долгорочни придобивки за земјоделците и за руралните средини“, нагласи Серафимовски.
На средбата беше потврдена заедничката заложба за ефикасно и одговорно користење на европските фондови, како и за навремено исполнување на обврските што произлегуваат од евроинтегративниот процес. Соговорниците посочија дека е неопходно реформите да обезбедат трајни резултати и дополнително да го унапредат развојот на земјоделскиот сектор.
