МНР ги отфрли тврдењата на СДСМ: Нема таен договор за францускиот предлог

Министерството за надворешни работи ги отфрли обвинувањата на СДСМ дека Владата подготвува прифаќање на францускиот предлог, оценувајќи дека станува збор за обид за создавање хистерија и дезинформирање на јавноста.

— реклама —

Во реакцијата се наведува дека тврдењата за таен договор или тајни преговори се невистинити и претставуваат, како што велат, уште една конструкција пласирана во јавноста.

— реклама —

Од Министерството посочуваат дека институциите редовно комуницираат со земјите членки на Европската Унија, европските институции, Бугарија и другите меѓународни партнери, а разговорите се водат транспарентно.

— реклама —

„Нема отстапки од националните интереси, идентитетот, јазикот и историјата. Полноправното членство во Европската Унија останува стратешка определба и крајна цел на оваа Влада“, се наведува во реакцијата.

Од МНР додаваат дека, за разлика од претходната власт, актуелната надворешна политика се води одговорно, принципиелно и во согласност со националните интереси, обвинувајќи го СДСМ дека преку вакви прес-конференции се обидува да им се додвори на одредени политички кругови во соседството наместо да ги брани интересите на државата.