Надворешната, безбедносната и одбранбената политика на Македонија добија високи оценки во Извештајот на ЕК, тврди Министерството за надворешни работи

Надворешната, безбедносната и одбранбената политика на Македонија повторно добија високи оценки во Извештајот на Европската комисија за 2026 година. Во Поглавјето 31 е утврдено добро ниво на подготвеност и напредок, со посебен акцент на целосната усогласеност на државата со Заедничката надворешна и безбедносна политика на Европската Унија.

Европската комисија оценува дека Македонија доследно се придружува кон официјалните позиции на ЕУ за меѓународните прашања, како и кон одлуките за рестриктивни мерки. Оваа усогласеност, според Извештајот, претставува сигнал за стратешката определба на државата за членство во Унијата и ја потврдува како доверлив партнер.

— реклама —

Добро ниво на подготвеност е забележано и во Поглавјето 30 – „Надворешни односи“, каде што се издвојуваат усогласувањето со трговската политика на ЕУ и активното учество во регионалната економска соработка.

— реклама —

Во Извештајот се наведува дека препораките од претходната година во голема мера се спроведени, а Македонија продолжила да учествува во политичкиот дијалог со ЕУ за надворешни и безбедносни прашања. Во април 2026 година во Брисел се одржа втората сесија на Дијалогот за безбедност и одбрана меѓу ЕУ и Македонија.

Позитивно се оценети и зголемената одбранбена подготвеност, како и хуманитарната, одбранбената и другата поддршка за Украина. Во јули 2026 година Македонија се приклучи и кон „Коалицијата на подготвените“.

— реклама —

Европската комисија го нотира и активното учество на државата во меѓународните организации, меѓу кои Обединетите нации, Советот на Европа и ОБСЕ, како и редовното усогласување со повеќето позиции на ЕУ во овие организации.

— реклама —

Како значајни успеси се издвојуваат и првиот избор на Македонија во Економско-социјалниот совет на Обединетите нации за мандатот 2027–2029 година, како и членството во Советот за човекови права за периодот 2025–2027 година.

Оценките во Извештајот, според Министерството за надворешни работи и надворешна трговија, ја потврдуваат надворешнополитичката ориентација на државата и нејзината определба за полноправно членство во Европската Унија.