Москва најавува визи за Црногорците по одлуката на Подгорица за руските државјани

Русија ќе воведе визен режим за граѓаните на Црна Гора како одговор на одлуката на Подгорица да го укине безвизниот режим за руските државјани. Ова го соопшти портпаролката на руското Министерство за надворешни работи, Марија Захарова, коментирајќи ја најавата дека од 1 ноември Русите ќе мора да имаат визи за влез во Црна Гора.

— реклама —

„Соодветно на тоа, и граѓаните на Црна Гора ќе мора да добијат визи за патување во Русија. Оваа одлука на Подгорица очигледно им штети на црногорските интереси“, изјави Захарова за весникот „Известија“.

— реклама —

Таа оцени дека, во име на европските перспективи, постојано се нарушуваат долгогодишните достигнувања во односите меѓу Русија и Црна Гора, без соодветно да се земаат предвид економските последици од таквите одлуки.

Според Захарова, новите мерки на црногорските власти ќе го намалат бројот на руски туристи, ќе им наштетат на црногорските претпријатија и ќе ја влошат инвестициската клима во земјата. Таа додаде дека Подгорица не треба да очекува Европската Унија да ги надомести неизбежните загуби.

— реклама —

Портпаролката на руското Министерство за надворешни работи оцени и дека процесот на интеграција во Европската Унија, кој ја поттикнал Црна Гора да воведе визи за руските државјани, повеќе не им остава простор на идните членки да задржат неутрален статус.

Захарова порача дека земјите од Западен Балкан треба да ги следат промените во Европската Унија и да ги анализираат последиците од европската интеграција врз сопствените национални интереси и благосостојбата на граѓаните.