Руските власти соопштија дека Москва во текот на ноќта била цел на еден од најголемите напади со беспилотни летала од почетокот на војната во Украина. Според градоначалникот на Москва, Сергеј Собјанин, кон московскиот регион биле насочени повеќе од 430 дронови.
Тој преку Телеграм информираше дека руската противвоздушна одбрана во текот на ноќта пресретнувала повеќе бранови беспилотни летала и дека 36 од нив биле соборени при приближувањето кон главниот град. Собјанин наведе дека поголемиот дел од леталата биле неутрализирани пред да стигнат до Москва, додавајќи дека на неколку локации паднале остатоци од дронови, но без информации за евентуални жртви или поголема материјална штета.
Руското Министерство за одбрана соопшти дека во текот на ноќта над територијата на земјата биле соборени вкупно 452 украински беспилотни летала. Според руската државна агенција ТАСС, станува збор за најголемиот напад врз Москва во последните две години.
Поради нападите привремено бил воведен посебен режим на работа на аеродромот Шереметјево, при што полетувањата и слетувањата биле дозволени само по координација со воздухопловните власти.
Во меѓувреме, украинскиот претседател Володимир Зеленски претходно изјави дека интензивирањето на нападите со дронови врз Москва може да придонесе за побрзо завршување на војната. Според него, доколку нападите врз рускиот главен град продолжат, раководството во Кремљ ќе биде принудено подиректно да се соочи со последиците од конфликтот.
