На денешната прес-конференција по повод две години од мандатот на Министерството за надворешни работи и надворешна трговија, министерот Тимчо Муцунски ги презентираше клучните активности и резултати реализирани во изминатиот период, истакнувајќи дека државата изградила поактивна, поотворена и поефикасна дипломатија.
„Во изминатите две години работевме со јасна визија, јасни приоритети и една цел – посилна меѓународна позиција на државата, посилни партнерства и конкретни придобивки за граѓаните. Денес можеме да кажеме дека изградивме поактивна, поотворена и поефикасна дипломатија“, изјави Муцунски.
Тој нагласи дека надворешната политика останала доследна на трите стратешки столба – партнерството со Соединетите Американски Држави, целосната усогласеност со Заедничката надворешна и безбедносна политика на Европската Унија и активното членство во НАТО.
Според Муцунски, во изминатите две години биле реализирани повеќе од 110 работни посети во странство и над 400 средби и состаноци, од кои повеќе од 210 билатерални средби со државници, министри и високи претставници. Воедно, земјава била домаќин на повеќе од 40 европски и светски лидери и високи претставници.
Осврнувајќи се на европската интеграција, министерот ја потврди посветеноста на Владата на реформите и европскиот пат, потсетувајќи на потпишувањето на Партнерството за безбедност и одбрана со Европската Унија, како и на средствата обезбедени преку Планот за раст за Западен Балкан.
„Европската комисија неодамна стави на располагање 65,7 милиони евра преку Инструментот за реформи и раст, што претставува највисок износ во регионот. Со тоа вкупниот износ на средства ставени на располагање за нашата држава достигна 142,1 милиони евра“, истакна Муцунски.
Тој посочи и дека државата била првата европска земја што одржала сесија на стратешкиот дијалог со новата администрација на САД, а дополнително биле продлабочени односите и преку договорите за стратешка соработка со Обединетото Кралство, Унгарија и Хрватска, како и преку потпишаниот меморандум за соработка со Обединетите Арапски Емирати.
Во делот на мултилатералната дипломатија, Муцунски ги издвои членството во Советот за човекови права на Обединетите Нации, членството во ЕКОСОК, реизборот во Извршниот совет на Организацијата за забрана на хемиското оружје и затворањето на постмониторинг-процедурата во Советот на Европа.
На крајот од обраќањето, министерот порача дека надворешната политика треба да биде простор за национално единство и долгорочен државен интерес.
„Нашата задача е јасна: да градиме држава која е почитувана, безбедна, економски поврзана и европски интегрирана“, рече Муцунски.
