Министерот за надворешни работи и надворешна трговија, Тимчо Муцунски, денеска оствари средба со заменик-потсекретарот за внатрешни работи на Соединетите Американски Држави, Џон Гоунтанис.
На средбата се разговараше за спроведувањето на билатералните приоритети и цели договорени во рамки на Втората сесија на Стратешкиот дијалог меѓу владите на Северна Македонија и Соединетите Американски Држави, која се одржа во април годинава.
Соговорниците ја потврдија заедничката заложба за понатамошно унапредување на соработката во областите од заемен интерес, со цел дополнително продлабочување на стратешкото партнерство меѓу двете држави.
Посебен акцент во разговорите беше ставен на енергетската и инфраструктурната отпорност, економската и трговската соработка, сајбер-безбедноста, миграциските прашања, како и на заедничките активности за борба против организираниот криминал и нелегалната трговија со дрога и други наркотични средства.
Во таа насока, беше истакната потребата од постојана координација и интензивирање на заедничките активности за реализација на договорените иницијативи, во согласност со стратешките интереси на двете земји.
