Министерот за надворешни работи и надворешна трговија, Тимчо Муцунски, учествува на Самитот на НАТО во Анкара како дел од македонската државна делегација, предводена од претседателката Гордана Сиљановска-Давкова.
Самитот, кој се одржува на покана на генералниот секретар на НАТО, Марк Руте, е посветен на клучните прашања поврзани со иднината на Алијансата, меѓу кои се зајакнувањето на колективната одбрана, зголемувањето на инвестициите во одбранбените капацитети, распределбата на товарот меѓу сојузниците, поддршката за Украина, развојот на одбранбената индустрија и актуелните безбедносни предизвици.
Во рамки на активностите на самитот, Муцунски денеска оствари билатерална средба со министерот за надворешни работи на Холандија, Том Берендсен.
На средбата беа разгледани билатералните односи меѓу двете земји, актуелните регионални и европски теми, како и соработката во рамките на НАТО, при што беше потврдена заедничката посветеност на натамошно продлабочување на партнерството.
