Министерот за надворешни работи и надворешна трговија Тимчо Муцунски од Истанбул порача дека одличните политички односи меѓу Македонија и Турција треба да се преточат во уште посилна економска соработка, поголема трговска размена и нови инвестиции.
Муцунски учествуваше на Бизнис форумот меѓу Република Турција и Република Северна Македонија, кој се одржа во Истанбул, а беше отворен заедно со турскиот министер за трговија, Омер Болат. На настанот присуствуваа претставници на институциите, стопанските комори и бизнис-заедниците од двете земји.
„Силните политички односи мора да се преточат во уште посилна економска соработка, поголема трговска размена, повеќе инвестиции и поконкретни можности за компаниите и граѓаните на двете земји“, истакна Муцунски.
Тој нагласи дека интегрирањето на надворешната трговија во рамките на Министерството претставува јасна потврда дека економската дипломатија е еден од клучните приоритети на државата.
„Економската дипломатија не е дополнување на надворешната политика – таа е во нејзиното јадро. Денес дипломатијата не се мери само преку политички дијалог, туку и преку способноста да отвора пазари, да привлекува инвестиции, да го поддржува извозот и да создава конкретни придобивки за граѓаните“, порача министерот.
Осврнувајќи се на економските односи, Муцунски потенцираше дека Турција е меѓу најзначајните економски и трговски партнери на земјата. Тој посочи дека повеќе од 3.000 турски компании се присутни на македонскиот пазар и имаат значаен придонес во економскиот развој и отворањето нови работни места.
Според него, билатералната трговска размена минатата година достигнала една милијарда американски долари, што претставува значаен успех, но и поттик за поставување уште поамбициозни цели.
Во рамките на посетата, Муцунски оствари и билатерална средба со министерот за трговија на Турција, Омер Болат, на која биле разгледани можностите за натамошно зголемување на трговската размена, нови инвестиции и зајакнување на институционалната соработка.
Соговорниците ја потврдија заедничката заложба за продлабочување на економските односи, оценувајќи дека посилната соработка меѓу двете земји придонесува за поголема регионална поврзаност, стабилност и економски просперитет.
