Министерот за надворешни работи и надворешна трговија, Тимчо Муцунски, учествуваше на министерска конференција во Вашингтон, посветена на заканите од политичкиот тероризам, што се одржа на покана на американскиот државен секретар Марко Рубио.
На конференцијата присуствуваа високи претставници од повеќе од 60 држави, кои разговараа за зајакнување на меѓународната соработка и институционалната подготвеност за справување со современите форми на политички мотивирано насилство и тероризам.
Во своето обраќање, Муцунски истакна дека кога насилството се користи за замолчување на политичкиот говор, заплашување на избрани функционери и граѓани, напади врз органите на прогонот или влијание врз демократските процеси, тогаш, како што рече, не станува збор за вообичаено политичко несогласување, туку за организирано политичко насилство, а во неговите најтешки облици и за тероризам.
Тој нагласи дека демократијата се темели на различноста на мислењата и дека слободните општества не смеат да се плашат од дебата, но потенцираше дека политичкото насилство никогаш не смее да стане легитимен начин за политички промени.
Осврнувајќи се на состојбите во регионот, Муцунски оцени дека заканата од политички мотивирано насилство има сериозни импликации и за Западен Балкан, нагласувајќи ја потребата од подобро разбирање на процесите на радикализација, следење на финансиската и логистичката поддршка и откривање на евентуални надворешни влијанија врз домашните тензии.
Министерот посочи дека дигиталниот простор значително ја променил природата на овие закани, бидејќи радикализацијата, пропагандата, регрутирањето и координацијата денес се одвиваат преку границите и во реално време. Затоа, според него, неопходна е поинтензивна размена на разузнавачки информации, поблиска соработка меѓу институциите и заеднички пристап во борбата против дигиталната радикализација и транснационалните мрежи.
Муцунски истакна дека како сојузник во НАТО и стратешки партнер на Соединетите Американски Држави, Македонија е подготвена активно да придонесе во заедничките напори за справување со овие закани.
На маргините на конференцијата, министерот оствари и работна средба со министерот за надворешни работи на Израел, Гидеон Саар, на која беше потврдена добрата билатерална соработка и заедничката подготвеност за нејзино понатамошно унапредување.
