Министерот за надворешни работи и надворешна трговија Тимчо Муцунски денеска учествува на министерскиот состанок на НАТО што се одржува во Хелсингборг, во Шведска.
Пред почетокот на состанокот, Муцунски изјави дека средбата претставува важна можност, речиси една година по Самитот во Хаг, да се направи пресек на постигнатото и да се разговара за подготовките за претстојниот самит во Анкара.
Тој посочи дека во фокусот на разговорите ќе бидат инвестициите во одбраната, развојот на одбранбените индустрии и поддршката за Украина.
„Ќе дискутираме за многу посветената поддршка што ја обезбедивме како сојуз за Украина и какви се нашите планови понатаму“, изјави Муцунски.
Министерот додаде дека состојбите на Блискиот Исток и на Западен Балкан исто така ќе бидат дел од дискусиите, нагласувајќи дека регионот и понатаму се соочува со безбедносни ризици и влијанија од надворешни фактори.
Муцунски оцени дека НАТО станува сè посилен со зголемената посветеност на сојузниците кон инвестициите во одбраната и додаде дека состанокот ќе биде можност за разговор и за предизвиците и за можностите пред Алијансата.
