Министерот за надворешни работи и надворешна трговија, Тимчо Муцунски, попладнево во Скопје се обрати на македонско-индискиот бизнис форум, организиран од Кабинетот на претседателот во соработка со Министерството за надворешни работи и надворешна трговија. На отворањето на форумот се обратија претседателката Гордана Сиљановска-Давкова и претседателката на Република Индија, Друпади Мурму, а беа презентирани и инвестициските можности на земјава.
Во своето обраќање, Муцунски нагласи дека добрите политички односи меѓу двете земји претставуваат цврста основа за посилна економска соработка, нови инвестиции и поголема трговска размена.
„Денес имаме можност силните политички односи да ги преточиме во уште посилно економско партнерство – партнерство што создава работни места, привлекува инвестиции, ја проширува трговијата и носи конкретни придобивки за нашите граѓани“, истакна Муцунски.
Тој посочи дека дипломатијата не се мери само преку одржаните средби и потпишаните договори, туку и преку можностите што ги создава, пазарите што ги отвора и економскиот просперитет што го поттикнува. Во таа насока, го нагласи значењето на интегрирањето на надворешната трговија во Министерството, со цел дипломатијата да придонесува за поврзување на компаниите и поддршка на претприемачите, истражувачките центри и иноваторите.
Муцунски ја оцени Индија како една од најзначајните економски успешни приказни на современото време, со забележителен раст, технолошко лидерство и силен претприемачки дух. Тој нагласи дека постои голем потенцијал за продлабочување на соработката во трговијата, инвестициите, иновациите, образованието, дигиталната трансформација и културата.
Во 2025 година, билатералната трговска размена достигнала речиси 132 милиони американски долари, што е речиси двојно повеќе во споредба со претходната година.
„Нашата амбиција е поголема – повеќе трговија, повеќе инвестиции, повеќе заеднички вложувања и повеќе компании што заеднички ќе создаваат вредност во двете земји“, порача министерот.
Осврнувајќи се на условите за инвестирање, Муцунски истакна дека земјава нуди стабилност, сигурност и партнерство, како и конкурентна пристапна точка кон Западниот Балкан и поширокиот европски пазар. Тој ја потврди определбата за зајакнување на владеењето на правото, подобрување на деловната клима, поддршка на извозно ориентираните индустрии и градење долгорочно партнерство со инвеститорите.
„Ако барате сигурен партнер – подготвени сме. Ако барате нови можности – отворени сме. Ако барате место за раст – го градиме денес“, истакна Муцунски.
Министерот нагласи дека Владите можат да ги создадат условите, институциите да ги отстранат пречките, а дипломатијата да ги отвори вратите, но претприемачите се тие што создаваат вредност, бизнисите создаваат работни места, а инвестициите ги трансформираат економиите.
На крајот, тој порача дека форумот треба да биде запаметен по партнерствата, инвестициите и деловните можности што ќе произлезат од него, повикувајќи потенцијалот, политичката волја и деловниот интерес да се преточат во конкретен напредок и долгорочен просперитет.
