Режисерот и идеен творец на проектот за одбележување на 35 години независност на Македонија, Дејан Пројковски, најави голем музичко-сценски спектакл на отворено, кој преку уметност ќе ги поврзе најзначајните моменти од независноста на државата.
Според него, проектот нема да биде класична хронологија на настаните, туку уметничко патување низ трите и пол децении независност.
„Проектот е замислен како музичко-сценски перформанс, чија тема е 35 години независност на Македонија. Тој ќе ги спои сите важни моменти од овие 35 години кои нѐ обединуваат и нѐ прават горди и среќни, се разбира, низ една уметничка перспектива. Овој перформанс нема да биде некаква хронологија, туку низ едно музичко-сценско патување ќе одиме низ тие 35 години и ќе ги споиме генерациите“, рече Пројковски.
Тој најави дека на сцената ќе настапат бројни пејачи, музичари и актери, а спектаклот ќе биде поддржан со современа сценска техника и технологија.
„Ова ќе биде еден од најголемите сценски спектакли на отворено. Ќе спои пејачи, музичари и актери, ќе ги споиме сите уметности. Покрај големиот број уметници на сцената, ќе имаме сериозна техника и технологија“, додаде Пројковски.
