Н1 го одби Вучиќ за предизборно гостување, иако тој со години ја избегнуваше телевизијата

Српската редакција на телевизијата Н1 одби Александар Вучиќ да гостува во предизборна емисија во среда и да ја претставува изборната листа „Александар Вучиќ – Обединета Србија“. Од телевизијата соопштија дека поканата до Српската напредна партија (СНС) останува отворена, но побараа партијата да испрати друг претставник.

— реклама —

— реклама —

Одлуката следува откако СНС одговорила дека во најавениот термин ќе гостува Вучиќ. Образложувајќи го одбивањето, редакцијата го посочи неговиот долгогодишен однос кон телевизијата, наведувајќи дека со години одбивал да гостува, а воедно ги навредувал новинарите, нарекувајќи ги терористи и странски платеници и обвинувајќи ги за поттикнување насилство и уривање на државата.

— реклама —

Од Н1 нагласија дека се подготвени да разговараат со Вучиќ по изборите, закажани за 25 октомври, кога ќе проценат дека постојат соодветен момент и повод за негово гостување. Телевизијата појасни дека одбивањето се однесува на предложеното предизборно гостување на Вучиќ, а СНС и понатаму може да го искористи предвидениот термин за претставување на својата изборна листа.