Либерално-демократската партија (ЛДП) преку соопштение соопшти дека на Конгресот на Алијансата на либералите и демократите за Европа (АЛДЕ), кој се одржува во Виена, е усвоена итна резолуција со која се повикува на прекин на историските блокади во процесот на проширување на Европската Унија и на подобар третман на граѓаните од земјите кандидати на европските граници.
Според партијата, резолуцијата била поднесена од ЛДП заедно со сестринските партии од Либералната мрежа на Југоисточна Европа (ЛИБСЕН), а поддршката од европските либерали ја оценуваат како значаен дипломатски успех.
Македонската делегација на Конгресот ја предводеле претседателката на ЛДП и ЛИБСЕН, Моника Зајкова, и меѓународниот секретар на партијата Емир Ќориќ.
Во резолуцијата, како што наведува ЛДП, се изразува загриженост поради примената на Системот за влез/излез (EES), кој земјите кандидати ги третира како трети земји, што, според партијата, создава административни пречки и неприфатлив третман на граѓаните на надворешните граници на Европската Унија. Во документот се повикува европските институции да ги преиспитаат овие правила и да обезбедат подобра заштита на достоинството на патниците и прекуграничната економија.
Воедно, со резолуцијата се бара и напуштање на практиката билатералните прашања да влијаат врз пристапниот процес на земјите кандидати. Европските либерали, според ЛДП, повикуваат одлучувањето за меѓучекорите во процесот на проширување да се врши со квалификувано мнозинство, наместо со едногласност, со цел процесот да се темели на исполнетите критериуми, а не на билатерални спорови.
Во документот се нагласува и дека постепената интеграција и пристапот до Единствениот европски пазар треба да бидат насочени кон конкретни придобивки за граѓаните и стопанството, како дел од патот кон полноправно членство во Европската Унија.
Претседателката на ЛДП, Моника Зајкова, оцени дека усвојувањето на резолуцијата претставува силна порака за поддршка на европската перспектива на Македонија и истакна дека партијата ќе продолжи да се залага за европска интеграција без политички условувања и историски блокади.
