Над 1.000 случаи на западнонилска треска во Европа: Најмногу заболени има во Италија и Грција

Бројот на локално стекнати инфекции со вирусот на Западен Нил во Европа надмина 1.000 од почетокот на годинашната сезона на пренос, покажуваат најновите податоци на Европскиот центар за превенција и контрола на болести (ECDC).

— реклама —

До 3 септември биле регистрирани вкупно 1.086 случаи во 15 европски земји, според најновото неделно ажурирање на ECDC. Бројот значително се зголемил во последните недели – на почетокот на август биле пријавени нешто повеќе од 240 случаи во седум земји.

Најмногу случаи има во Италија, каде што се регистрирани 516 заболени. Следуваат Грција со 284 и Шпанија со 88 случаи.

— реклама —

Вирусот досега е регистриран во 144 подрачја низ Европа, од кои 62 се во Италија. Сепак, од ECDC предупредуваат дека бројките не ја прикажуваат целосно распространетоста на вирусот.

— реклама —

Западнонилскиот вирус главно се пренесува меѓу дивите птици преку комарци. Заразените комарци потоа можат да го пренесат вирусот и на луѓето.

Според германскиот Институт „Роберт Кох“, околу 20 отсто од заразените развиваат симптоми слични на грип, додека кај приближно еден од 100 заразени лица болеста може да добие тешка форма.

Во најголем број случаи, инфекцијата со вирусот на Западен Нил поминува без сериозни компликации. Сепак, кај пациентите кои развиваат тешка форма на болеста може да се појават и долготрајни последици.