Нафтата поевтинува, пазарите се надеваат на повторно отворање на Ормускиот Теснец

Цената на нафтата на светските пазари падна кон 86 долари за барел, поттикната од надежите дека напредокот во разговорите меѓу Иран и Оман може да доведе до повторно отворање на Ормускиот Теснец и олеснување на нарушувањата во поморскиот сообраќај.

На лондонскиот пазар, цената на барелот брент околу пладне изнесуваше 86,70 долари, што е пад од 1,88 долари во однос на претходното затворање. На американскиот пазар, нафтата поевтини за 1,61 долар, на 80,75 долари за барел.

— реклама —

Во центарот на вниманието се разговорите меѓу Иран и Оман за договор со кој би се овозможил транспорт на нафта и други петрохемиски производи низ Ормускиот Теснец. Напредокот во преговорите ги зголеми очекувањата дека танкерскиот сообраќај би можел постепено да се нормализира.

— реклама —

Според иранската новинска агенција „Тасним“, Иран и Оман постигнале договор за нивните удели и приходите поврзани со Ормускиот Теснец. Сепак, иранската Револуционерна гарда обвини дека САД ги попречуваат преговорите, поради што тие биле одложени.

Сообраќајот низ теснецот и натаму е значително намален. Во вторникот низ него поминале само пет бродови што превезуваат суровини, додека десетдневниот просек изнесува околу 15 бродови дневно.

— реклама —

На пазарите се следат и напорите за пошироко решение на конфликтот. Пакистан и Иран соопштија дека постигнале „значителен напредок“ во разговорите насочени кон прекин на војната и воспоставување мир.

Во меѓувреме, Вашингтон ги прошири санкциите насочени кон иранската економија и предупреди дека може да санкционира земји што продолжуваат да соработуваат со Техеран.

Одделно, ОПЕК соопшти дека цената на барелот од кошницата на нејзините членки во вторникот паднала за 4,44 долари, на 90,28 долари.