Портпаролката на СДСМ, Богданка Кузеска, преку објава на социјалните мрежи оцени дека актуелното раководство на партијата од првиот ден се соочува со силни притисоци и напади, без да добие, како што рече, ниту еден ден простор за нормален почеток на својот мандат.
Според неа, најголем проблем е што, наместо нападите да доаѓаат од политичките противници, тие пристигнуваат од редовите на самата партија.
„Вистината е дека ова раководство на СДСМ не доби ниту еден ден шанса. Од првиот ден, во најтешкиот можен контекст, е под постојан оган. И најболно е што сопките не доаѓаат од власта, туку одвнатре“, истакна Кузеска.
Таа потсети на периодот по изборниот пораз на СДСМ, кога, како што рече, партијата останала сама и покрај тоа застанала зад сите свои членови кои се соочиле со политички и правни последици.
Кузеска нагласи дека токму луѓето кои и денес јавно ја бранат партијата биле меѓу ретките што останале активни и во најтешките моменти, додека, според неа, дел од оние што сега настапуваат со различни платформи тогаш не биле присутни.
Таа порача дека актуелното раководство не бара сочувство, туку поддршка за да ја води партијата напред, додавајќи дека секој кој искрено сака силен СДСМ треба своите различни ставови да ги стави во функција на јакнење, а не на слабеење на партијата.
