(Видео) „Записникот открива: Владата на Мицкоски нудела државни акции за Давор Мацура и неговата Алта банка!“, вели Кузеска

Записникот од владината седница од 23 септември 2025 година покажува дека Владата предводена од Христијан Мицкоски носела заклучоци поврзани со преземање акции од 16 јавни институции од страна на „Алта банка“ АД Белград, обвини портпаролката на СДСМ и членка на Извршниот одбор, Богданка Кузеска.

— реклама —

На прес-конференција, таа изјави дека заклучоците биле донесени на предлог на министерката Кочоска и дека државни акции биле нудени во интерес на Давор Мацура и „Алта банка“.

Кузеска потсети дека СДСМ уште пред една година предупредувала за банката, за која тврди дека е поврзана со криминални структури и со парите на српскиот претседател Александар Вучиќ. Таа ги обвини Мицкоски и гувернерот на Народната банка, Трајко Славески, дека овозможиле нејзин влез во Македонија со сомнителен капитал.

— реклама —

Портпаролката на СДСМ посочи и на противречностите во изјавите на Славески и Кочоска околу тоа дали имало консултации и дали министерката била информирана за одлуките. Според неа, додека Славески зборувал за консултации, Кочоска изјавила дека немало и дека не била известена.

— реклама —

Кузеска оцени дека најавите за продажба на банката на нов сопственик отвораат сомнежи дека се прави обид случајот да се заташка. Таа тврдеше и дека власта врши притисок врз потенцијални странски и домашни купувачи.

СДСМ бара Јавното обвинителство веднаш да отвори истрага за Мицкоски, Славески и Кочоска, како и Европското обвинителство да го провери текот на парите поврзани со „Алта банка“. Кузеска порача дека сите вмешани во случајот треба да понесат одговорност.

— реклама —