(Видео) „Часовникот отчукува, Обвинителството веднаш да постапи за Алта банка“, вели Кузеска

Портпаролката и членка на Извршниот одбор на СДСМ, Богданка Кузеска, на прес-конференција побара Јавното обвинителство веднаш да отвори постапка и да ги испита сите околности поврзани со влезот на „Алта банка“ на македонскиот пазар, најавувајќи дека ќе поднесе кривични пријави доколку институциите не постапат.

Богданка Кузеска, на прес-конференција порача дека обвинителството и јавниот обвинител Ненад Савески не смеат повеќе да чекаат, посочувајќи дека во Србија на „Алта банка“ ѝ била одземена дозволата, бил отворен стечај, а сопственикот Давор Мацура бил уапсен. Таа се повика и на истрага за 380 милиони евра.

— реклама —

Од СДСМ обвинуваат дека Христијан Мицкоски и Трајко Славески имале клучна улога во влезот на банката во Македонија, иако, според партијата, постоеле претходни предупредувања за нејзиниот капитал и поврзаноста со српскиот претседател Александар Вучиќ и владејачката Српска напредна странка.

— реклама —

Кузеска се повика и на изјава на Славески, за која тврди дека претставува јавно признание оти зад одлуката за „Алта банка“ стоел Мицкоски. Таа отвори прашања и за постапувањето на Народната банка, како и за наводното непочитување на одредбите од Законот за банки во врска со стекнувањето квалификувано учество.

Од СДСМ посочуваат дека „Алта груп“ во 2024 година била правосилно санкционирана од австриската финансиска управа ФМА, поради што сметаат дека морало да се проверат условите за стекнување сопственички удел во банка. Дополнително, партијата тврди дека Владата донела заклучоци со кои му овозможила на Мацура да стекне поголем пакет акции, како и дека му било дозволено да купи осигурително друштво.

— реклама —

СДСМ бара да се испитаат улогата на Мицкоски, постапувањето на Славески, предлогот на министерката Кочоска, владините заклучоци, како и потеклото и движењето на парите. Од партијата предупредуваат дека отсуството на институционална реакција ја продлабочува недовербата и отвора сомнежи за можно прикривање на случајот.

— реклама —

Кузеска порача дека доколку Обвинителството не постапи, СДСМ ќе поднесе кривични пријави и побара од јавниот обвинител да ја гарантира независноста на институцијата и да работи во согласност со Уставот и законите.