(Видео) „Молкот на Обвинителството за Алта банка отвора сомнеж дека се штити Мицкоски“, вели Кузеска

Портпаролката и членка на Извршниот одбор на СДСМ, Богданка Кузеска, побара Обвинителството итно да отвори истрага за случајот со Алта банка, обвинувајќи дека молкот на институцијата отвора сомнеж за заштита на премиерот Христијан Мицкоски.

— реклама —

На прес-конференција таа рече дека, според информациите на СДСМ, во Србија на Алта банка ѝ била одземена дозволата, бил отворен стечај, сопственикот Давор Мацура бил уапсен, а се водела истрага за 380 милиони евра. Наспроти тоа, Кузеска оцени дека во Македонија нема соодветна реакција од Обвинителството, додека граѓаните не можат да дојдат до своите пари.

Таа потсети на изјавата на Трајко Славески за консултациите со Мицкоски околу влезот на Алта банка, како и на претходните предупредувања на СДСМ за потеклото на капиталот и политичката заднина на банката.

— реклама —

Кузеска побара да се испита и санкцијата што ја изрекол австрискиот регулатор за Алта Груп, како и постапката за стекнување квалификувано учество во банка. Таа ја обвини Владата дека со свои заклучоци му овозможила на Мацура да стекне поголем пакет акции на сметка на државата.

— реклама —

Од СДСМ бараат истрагата да ги опфати улогата на Мицкоски, постапувањето на Славески, предлогот на Кочоска, владините заклучоци и потеклото и текот на парите. Кузеска побара и да се обезбеди документацијата за сметките и трансакциите на банката.

Таа најави дека доколку Обвинителството не постапи, СДСМ ќе поднесе кривични пријави за случајот со Алта банка.

— реклама —