(Видео) „Славески призна дека одлуката за Алта банка ја донел Христијан Мицкоски!“ вели Кузеска

Портпаролката и членка на Извршниот одбор на СДСМ, Богданка Кузеска, на прес-конференција обвини дека премиерот Христијан Мицкоски директно одлучувал за влезот на Алта банка на македонскиот пазар, повикувајќи се на изјава на гувернерот на Народната банка, Трајко Славески.

Кузеска оцени дека изјавата на Славески претставува потврда на тврдењата што СДСМ ги изнесува во изминатите 11 месеци. Според неа, одлуката била донесена со образложение дека, како стратешка гранка, банкарството барало исполнување на услови на „политичка сензитивност“.

— реклама —

Таа ја обвини власта дека овозможила влез на Алта банка во Македонија и покрај, како што рече, сомнежите за потеклото на капиталот и случувањата поврзани со оваа финансиска група во други држави. Кузеска тврди дека последиците од случајот ги чувствуваат граѓаните, пензионерите и компаниите, кои, според неа, се соочуваат со проблеми при пристапот до своите средства и исплатата на платите.

На прес-конференцијата таа повтори и дел од претходните обвинувања на СДСМ за сопственикот на банката, Давор Мацура, како и за наводните политички и деловни врски поврзани со нејзиното работење. Се повика и на документи за кои тврди дека покажуваат оти Владата донела заклучоци со кои акции од државни претпријатија биле понудени во интерес на Мацура и Алта банка.

— реклама —

Кузеска посочи дека во други држави имало санкции, суспензии, одбивања и истраги поврзани со Алта банка и нејзиното работење. Таа го отвори и прашањето за најавата на Мицкоски дека ќе преговара со потенцијални купувачи на Алта банка во Македонија, прашувајќи како е можно премиерот да има таква улога кога Народната банка е независна институција.

— реклама —

Од СДСМ побараа Мицкоски да одговори колкупати разговарал со српскиот претседател Александар Вучиќ за Алта банка и колкупати се сретнал со Мацура, како и дали на тие средби станало збор за провизии.

Кузеска побара и проверка на податоците за 80 милиони евра во готовина или готовински еквиваленти, кои, според неа, се наведени во билансот на Алта банка Битола. Таа изрази сомнеж дали овие средства навистина постојат во трезорот и документите на банката, повикувајќи се на тврдења дека такви средства немало во банката на Мацура во Белград.

— реклама —

На крајот, СДСМ го повика Јавното обвинителство да отвори истрага за Мицкоски, Славески и министерката Кочоска, а побара и вклучување на Европското обвинителство за проверка на текот на парите поврзани со Алта банка. Кузеска порача дека сите лица за кои ќе се утврди вмешаност во евентуални незаконитости треба да одговараат пред законот.