„Најмалку двапати ја прогласиле загадената вода во Гостивар за безбедна - еден месец подоцна никој од здравствениот синџир не е ни разрешен“, велат од Левица

Левица преку соопштение обвинува дека водата во Гостивар најмалку двапати била оценета како безбедна, иако според подоцнежната истрага, во тој период веќе постоела контаминација на водоснабдителниот систем.

Од партијата посочуваат дека на 29 јуни, Центарот за јавно здравје Тетово издал стручно мислење потпишано од Берун Мустафа, според кое водата „одговара на законските и стручните прописи“. Според Левица, спорните пумпи во тој момент веќе биле поставени и загадената вода веќе влегувала во системот.

— реклама —

Уште едно уверување дека водата е безбедна било издадено на 13 јули, а само еден ден подоцна започнал масовниот прилив на пациенти со дијареја, повраќање, температура и истоштеност.

Од Левица прашуваат кој ги земал мострите, од која точка и во кое време, како биле транспортирани, кои параметри биле испитувани и кој ги верификувал резултатите.

— реклама —

Партијата ја посочува и улогата на Институтот за јавно здравје, нагласувајќи дека центрите за јавно здравје ја сочинуваат Мрежата за јавно здравје, чија стручна работа ја координира Институтот.

— реклама —

Во соопштението се поставува прашањето и за одговорноста на министерот за здравство Сашо Клековски, со оглед на тоа што, според Левица, министерот има надлежност во именувањето и разрешувањето на директорот на ЦЈЗ Тетово.

„Прашањето повеќе не е што знаел Клековски, туку што презел“, наведуваат од партијата, барајќи утврдување на одговорност за раководните лица и за сите што учествувале во изготвувањето, одобрувањето и надзорот на спорните извештаи.

— реклама —

Левица бара и одговор од Државниот санитарен и здравствен инспекторат, како и од Јавното обвинителство за тоа што е преземено во врска со извештаите од 29 јуни и 13 јули и нивните потписници.

Од партијата велат дека додека не се утврди лична и институционална одговорност, не може да се тврди дека системот функционира.