Најпосетуваниот музеј во светот се соочува со можно затворање: Обновата чини една милијарда евра

Директорот на музејот Лувр во Париз, Кристоф Лерибо, предупреди дека најпосетуваниот музеј во светот би можел да се соочи со затворање доколку не се спроведе обемна реконструкција. Тој се залага за проект вреден една милијарда евра, со кој треба да се решат проблемите со застарената инфраструктура, огромните гужви и безбедносните пропусти.

Во интервју за францускиот весник „Ле Фигаро“, Лерибо ја повика идната француска влада, која ќе биде формирана по претседателските избори, да ја поддржи трансформацијата на музејот.

— реклама —

„Без обновување, Лувр ризикува да го изгуби својот статус и на крајот би можел да биде принуден да се затвори, што би било катастрофа“, предупреди Лерибо.

Тој оцени дека најпосетуваниот музеј во светот е во многу лоша состојба и дека неговите капацитети се целосно преоптоварени. Лерибо беше именуван за директор на музејот во февруари.

Неговото предупредување доаѓа речиси една година по грабежот на 19 октомври 2025 година, кога беа украдени осум скапоцени предмети од француските кралски накити. Кражбата откри сериозни безбедносни пропусти и ја втурна институцијата во криза.

— реклама —

Лерибо го поддржува проектот наречен „Нова ренесанса на Лувр“, кој предвидува модернизација на музејот и подобрување на безбедноста преку реконструкција на историската зграда и нејзината инфраструктура.

Проценетата вредност на проектот изнесува една милијарда евра. Планот опфаќа обновување на музејот и изградба на нов влез, а завршувањето на работите би можело да потрае од 12 до 15 години.

— реклама —

Лерибо не ја исклучува можноста за ново зголемување на цените на влезниците, но нагласува дека евентуалното поскапување треба да биде многу умерено.

Цените на влезниците за посетителите од земјите надвор од Европа веќе беа зголемени годинава, од 22 на 32 евра.

Директорот планира да собере 360 милиони евра од француски и меѓународни донатори за да помогне во финансирањето на проектот.

На плановите, сепак, им се противат синдикатите. Засега не се потпишани обврзувачки договори за донации, иако Лерибо изјавил за „Ле Фигаро“ дека странските донатори се подготвени да го поддржат музејот.

Доколку не се обезбедат потребните средства и не се спроведе планираната реконструкција, според предупредувањето на директорот, Лувр би можел да се соочи со сериозни последици за своето функционирање.