Тајланд ќе го скрати времетраењето на безвизниот престој за туристите од 93 земји од 60 на 30 дена, соопштија властите во земјата.
Министерот за надворешни работи Сихасак Фуангкеткеов изјави дека мерката е донесена со цел да се спречат криминални активности и злоупотреба на продолжениот престој.
Покрај тоа, тајландските власти ќе вршат дополнителни проверки и на другите видови визи за да се утврди дали лицата што влегуваат во земјата навистина ја исполнуваат целта за која визата е издадена.
Министерот не прецизираше кога новите правила официјално ќе стапат во сила.
Според агенцијата Ројтерс, мерките се насочени кон решавање на проблемот со злоупотреба на визите и учество на дел од туристите во нелегални активности.
Од почетокот на годинава, Тајланд го посетиле 12,4 милиони странски туристи, а туризмот останува еден од клучните двигатели на економијата на земјата.
