Нападите во Ормускиот теснец ја подигнаа цената на нафтата

Светските цени на нафтата пораснаа во вторникот по информациите за напад врз трговски бродови во Ормускиот теснец, една од најважните поморски рути низ која се транспортира значителен дел од глобалните испораки на сурова нафта.

— реклама —

Цената на северноморската нафта „брент“ за испорака во септември се зголеми за 1,5 проценти и достигна 73,09 долари за барел. Американската сурова нафта WTI, со испорака во август, исто така поскапе за 1,5 проценти и се тргуваше по 69,56 долари за барел, откако претходниот ден го достигна најниското ниво од крајот на февруари.

Порталот Axios, повикувајќи се на двајца американски претставници, објави дека Иран испукал најмалку две ракети кон трговски бродови кои пловеле низ Ормускиот теснец. Според истиот извештај, бродовите претрпеле сериозни оштетувања, но нема информации за загинати или повредени. CNBC соопшти дека не успеал независно да ги потврди овие наводи.

— реклама —

Во меѓувреме, британскиот Центар за поморски трговски операции (UKMTO) информираше дека примил пријава за инцидент во близина на Лимах, во Оман. Според првичните информации, танкер бил погоден од непознат проектил, по што избувнал пожар. Ниту во овој случај нема пријавени жртви.

— реклама —

Новите случувања повторно ја зголемија загриженоста за стабилноста на снабдувањето со нафта на светските пазари и ја нагласија неизвесноста околу привременото примирје меѓу САД и Иран. Иако минатиот месец двете страни потпишаа меморандум за разбирање со цел да се стави крај на повеќемесечниот конфликт, последната рунда индиректни разговори не донесе конкретен напредок кон траен договор.

Американскиот претседател Доналд Трамп во понеделникот повторно порача дека Вашингтон или ќе постигне договор со Техеран или, како што рече, ќе ја „заврши работата“, повторно оставајќи отворена можност за употреба на воена сила.

— реклама —

Според аналитичарите, и покрај новите инциденти, и САД и Иран имаат интерес да избегнат поширока ескалација. Економистот Холгер Шмидинг од „Беренберг“ оценува дека Вашингтон настојува да ги задржи цените на нафтата под контрола во пресрет на изборите за Конгресот, додека Техеран очекува економска корист доколку во иднина дојде до ублажување на санкциите.