Народна банка: Надворешниот долг на Македонија порасна за 742 милиони евра во првиот квартал

Според најновото соопштение на Народната банка на Република Македонија, бруто надворешниот долг на земјава на крајот од првиот квартал на 2026 година достигнал 12,943 милијарди евра, што претставува зголемување од 742 милиони евра во однос на претходниот квартал.

— реклама —

Од Народната банка информираат дека бруто надворешниот долг изнесува 70,5 проценти од проектираниот бруто-домашен производ за 2026 година. Најголем дел од кварталното зголемување се должи на растот на јавниот долг, кој е повисок за 463 милиони евра, пред сè поради издавањето нова еврообврзница. Приватниот надворешен долг, пак, е зголемен за 280 милиони евра.

— реклама —

Во истиот период, бруто надворешните побарувања се зголемиле за 523 милиони евра и достигнале 8,139 милијарди евра, односно 44,3 проценти од проектираниот БДП. Раст е забележан и кај јавните и кај приватните побарувања, при што најголемо зголемување има кај капитално поврзаните субјекти.

Поради побрзиот раст на обврските во споредба со побарувањата, нето надворешниот долг на крајот на март изнесува 4,804 милијарди евра или 26,2 проценти од проектираниот БДП, што претставува квартално зголемување од 218 милиони евра. Притоа, приватниот сектор и натаму има најголемо учество во вкупниот нето-долг, со околу 68 проценти.

— реклама —

Во соопштението на НБРМ се наведува и дека во првиот квартал од годинава е зголемена негативната нето меѓународна инвестициска позиција, која достигнала 9,009 милијарди евра, што е еквивалентно на 49,1 проценти од проектираниот БДП за 2026 година.

— реклама —

Податоците покажуваат дека зголемувањето на негативната меѓународна инвестициска позиција е резултат на побрзиот раст на надворешните обврски во однос на растот на надворешните средства, при што најголемо влијание имаат должничките инструменти.