Либерално-демократската партија преку соопштение оцени дека најновите изјави на гувернерот на Народната банка, Трајко Славески, претставуваат потврда на долгогодишните предупредувања за високите банкарски провизии што ги плаќаат граѓаните.
Од партијата посочуваат дека по најавите за зголемување на цените на банкарските услуги и ставот на гувернерот дека се потребни законски измени за ограничување на провизиите, станува јасно дека проблемот со високите банкарски трошоци повеќе не може да се игнорира.
ЛДП потсетува дека преку кампањата „Твоја сметка – твои пари“, како и преку законски иницијативи поднесени во Собранието од претседателката Моника Зајкова, со години се залага за намалување на банкарските надоместоци и поголема заштита на корисниците на финансиски услуги.
Од партијата очекуваат Владата и парламентарното мнозинство да покажат политичка волја и да ги поддржат реформите кои ќе овозможат пониски трошоци за граѓаните при користење на банкарските услуги.
Според ЛДП, пристапот до сопствената плата, пензија или заштеда не смее да претставува дополнителен извор на заработка преку високи провизии, туку банкарскиот систем треба да биде во функција на граѓаните и нивните потреби.
Партијата најавува дека ќе продолжи да се залага за фер, транспарентни и подостапни банкарски услуги, со цел средствата на граѓаните да останат кај граѓаните.
