И покрај високото ниво на дигитална подготвеност кај граѓаните, прифаќањето на електронските плаќања кај малите трговци останува еден од најголемите предизвици за платниот систем во земјава. На ова укажа вицегувернерот на Народната банка, Игор Величковски, на работилницата „Премостување на јазот кај прифаќањето на електронските плаќања од страна на трговците: Форум на засегнатите страни за заклучоците и следните чекори“, организирана во соработка со Светската банка.
Величковски посочи дека Северна Македонија има солидна основа за развој на дигиталните плаќања. Дури 84 проценти од граѓаните поседуваат платежна сметка, а три од четири лица кои имаат сметка користеле дигитални канали за примање или испраќање плаќања. Дополнително, интернет и мобилната мрежа покриваат повеќе од 90 проценти од територијата на државата.
Сепак, и покрај ваквите показатели, повеќе од 90 проценти од плаќањата за стоки и услуги кај малите трговци сè уште се вршат во готовина. Во моментов, околу 36.000 уреди за прифаќање плаќања се поставени кај приближно 16.700 трговци, што покажува дека дигиталните плаќања не се подеднакво застапени, особено кај помалите бизниси.
„Главниот предизвик не е дали граѓаните можат да плаќаат дигитално, туку дали малите трговци можат лесно да ги прифатат тие плаќања. Тие сè уште ги доживуваат електронските плаќања како скапи и сложени“, истакна Величковски.
Тој најави повеќе мерки за надминување на овој јаз, меѓу кои воведување инстант плаќања до крајот на годината преку систем базиран на ТИПС-платформата, национален интероперабилен QR-код, плаќања преку едноставни идентификатори, инстант потврди за трансакциите и развој на услугата „Барање за плаќање“, како и дополнителен развој на мобилните апликации.
Според Величковски, овие решенија ќе помогнат да се намалат трошоците и административните процедури за малите трговци, овозможувајќи им полесно да ги прифаќаат дигиталните плаќања.
„Со овие услуги, прифаќањето дигитални плаќаања може да стане едноставно како примање порака на мобилен телефон“, нагласи вицегувернерот.
Тој ја истакна и важноста на соработката со Светската банка во процесот на модернизација на платежната инфраструктура, приклучувањето кон СЕПА и спроведувањето на реформите во оваа област.
„Целта е секој мал трговец во државата да има можност да прифаќа дигитални плаќања без високи трошоци, сложени процедури и технички пречки“, порача Величковски.
