И покрај солидната кредитна активност во економијата, Народната банка оцени дека нема потреба од дополнително затегнување на макропрудентната политика и одлучи стапката на противцикличниот заштитен слој на капиталот да остане на ниво од 2 проценти.
Одлуката ја донесе Извршниот одбор на Народната банка врз основа на редовната квартална процена на системските ризици, направена според податоците заклучно со првиот квартал од 2026 година. Истата стапка ќе се применува и во третото тримесечје од 2027 година.
Од Народната банка посочуваат дека тековните макрофинансиски услови и состојбите во банкарскиот сектор укажуваат дека сегашното ниво на заштитниот слој е соодветно.
Според оценките, банкарскиот систем останува стабилен, добро капитализиран и ликвиден, со висока отпорност на потенцијални шокови. Тоа се потврдува и преку ниската стапка на нефункционални кредити, која продолжува да се намалува, како и преку солидната профитабилност на банките.
Во соопштението се наведува дека одлуката е поддржана и од ефектите на построгите макропрудентни мерки за квалитетот на кредитната побарувачка, кои почнаа да се применуваат кон крајот на минатата година.
Првичните показатели за првиот квартал од 2026 година покажуваат подобрување на структурата на новоодобрените кредити и поголемо почитување на кредитните стандарди од страна на банките.
Од централната банка оценуваат дека ваквата поставеност на мерките ќе придонесе за ограничување на системските ризици и за натамошно зачувување на стабилноста и отпорноста на банкарскиот сектор.
Народната банка најавува дека и во иднина внимателно ќе ги следи движењата во финансискиот систем и на квартална основа ќе ја преоценува потребата од евентуални промени на стапката на противцикличниот заштитен слој на капиталот.
