Народната банка одлучи стапката на противцикличниот заштитен слој на капиталот за изложеноста на банките во земјава да остане 2 проценти. Стапката ќе се применува од четвртото тримесечје на 2027 година, а одлуката е донесена по редовната квартална оцена на системските ризици, врз основа на податоците заклучно со вториот квартал од 2026 година.
Од Народната банка оценуваат дека сегашното ниво е соодветно на макрофинансиските услови и состојбите во банкарскиот систем. Според оцената, банкарскиот сектор е стабилен и отпорен на шокови, што го потврдуваат и резултатите од стрес-тестовите, како и соодветната капитализираност и ликвидност, ниската стапка на нефункционални кредити и солидната профитабилност.
Одлуката е поврзана и со макропрудентните мерки воведени на крајот од минатата година, како и со измените кај задолжителната резерва. Во билансите на банките се забележува подобрување на структурата на новоодобрените кредити според висината на показателите ЛТВ и ДСТИ.
Кај депозитите на домаќинствата, пак, продолжуваат поволните промени во однос на нивната рочна и валутна структура.
Од Народната банка очекуваат ваквата поставеност на макропрудентните мерки да придонесе за ограничување на системските ризици и задржување на стабилноста и отпорноста на банкарскиот сектор во следниот период.
Висината на противцикличниот заштитен слој на капиталот ќе продолжи да се следи и преоценува на квартална основа.
