Народната банка одлучи да ја зголеми основната каматна стапка за 0,25 процентни поени, односно од 4 на 4,25 проценти, по оценката дека инфлациските притисоци и натаму се присутни, а геополитичката неизвесност продолжува да претставува ризик за домашната економија.
Одлуката беше донесена на редовната седница на Извршниот одбор, одржана на 16 јуни 2026 година, врз основа на најновите економски показатели и проценките за влијанието на глобалните случувања врз македонската економија.
Од Народната банка посочуваат дека од почетокот на годината е забележана зголемена побарувачка на девизи од корпоративниот сектор, што условило поголемо присуство на централната банка на девизниот пазар. Сепак, од почетокот на мај се бележи стабилизирање на побарувачката на девизи, а најновите информации внесуваат поголема извесност дека наскоро би можело да дојде до смирување на конфликтот на Блискиот Исток.
И покрај тоа, економските последици од геополитичките случувања сè уште се чувствуваат, додека неизвесноста околу целосната стабилизација на состојбите продолжува да создава ризици.
Во мај, годишната стапка на инфлација се намали на 4,8 проценти, во споредба со 5,7 проценти во април, главно поради поумерениот раст на цените на храната. Сепак, Народната банка предупредува дека притисоците врз цените на енергенсите остануваат силни и можат да се прелеат и врз останатите цени во економијата.
Девизните резерви на крајот на мај достигнале 5,209 милијарди евра и, според централната банка, остануваат во сигурната зона. Во истиот период, девизниот пазар бил стабилен, без потреба од интервенции за обезбедување дополнителна девизна ликвидност.
Домашната економија, според Народната банка, и понатаму покажува отпорност. Во првиот квартал од 2026 година, реалниот раст на бруто-домашниот производ изнесувал 3,1 процент, што е блиску до претходните проекции.
Од централната банка наведуваат дека умереното затегнување на монетарната политика, заедно со претходно преземените мерки, ќе придонесе за зачувување на стабилноста на девизниот курс на денарот, стабилизирање на инфлацијата и зацврстување на инфлациските очекувања.
Народната банка нагласува дека останува посветена на одржувањето на стабилноста на девизниот курс на денарот во однос на еврото и дека внимателно ќе продолжи да ги следи домашните и меѓународните економски текови, подготвена да ги искористи сите расположливи инструменти за зачувување на макроекономската и финансиската стабилност.
