Народната банка најавува инстант плаќања 24/7: Величковски ги претстави новите реформи

Вицегувернерот на Народната банка, Игор Величковски, оцени дека монетарната политика и платните системи претставуваат двата клучни столба на современото централно банкарство, нагласувајќи дека континуираните реформи придонесуваат за поголема стабилност и развој на финансискиот систем.

— реклама —

Во своето обраќање во билтенот на Македонската банкарска асоцијација, Величковски посочи дека измените во оперативната монетарна рамка, усвоени кон крајот на минатата година, придонеле за подобро функционирање на меѓубанкарскиот пазар на пари и поефикасен пренос на монетарната политика.

— реклама —

Тој истакна дека во изминатите години Народната банка спровела значајни реформи во областа на платежните услуги и платните системи, со кои се зголемиле конкуренцијата, безбедноста на плаќањата и заштитата на корисниците. Со усогласувањето со европските стандарди и приклучувањето кон СЕПА, овозможени се побрзи и поевтини плаќања во евра.

Според Величковски, во тек е подготовка на нов систем за инстант-плаќања, базиран на технологијата ТИПС на Европската централна банка, кој ќе овозможи трансакции во денари во реално време, 24 часа дневно и седум дена во неделата.

— реклама —

Тој нагласи дека новата инфраструктура ќе овозможи побрзи домашни и прекугранични плаќања, ќе придонесе за развој на иновативни решенија преку мобилни апликации и ќе им овозможи на трговците побрзо располагање со средствата.

Вицегувернерот потенцира дека постигнатите резултати се плод на заедничката работа на Народната банка, Министерството за финансии, банките и останатите учесници во финансискиот сектор, додавајќи дека реформите ќе продолжат со цел понатамошна модернизација и приближување кон европските стандарди во интерес на граѓаните и компаниите.