„Не работат скенери, томографи, фалат лекови - со Клековски и Мицкоски здравството е во хаос“, велат од СДСМ

СДСМ преку соопштение обвини дека здравствениот систем се соочува со сериозни проблеми и дека граѓаните се принудени да чекаат за прегледи, дијагностика и терапија. Од партијата посочуваат дека дел од медицинската опрема не функционира, а има и недостиг од лекови.

Според СДСМ, три недели не работи ниту еден компјутерски томограф во Клиничкиот центар, поради што пациентите, како што велат, чекаат за прегледи и дијагностика.

— реклама —

Од опозициската партија наведуваат и дека ПЕТ-скенот во изминатите две години не функционирал во континуитет, иако е особено значаен за онколошките пациенти. Тврдат дека апаратот повторно бил ставен во функција само два дена, по што повторно се расипал, додека пациентите чекале и по пет месеци за ПЕТ-скен.

— реклама —

СДСМ посочува и на податокот дека минатата година биле дијагностицирани околу 1.000 нови случаи на рак на дојка. Партијата обвинува дека онколошки пациенти во повеќе наврати со месеци биле оставени без потребната терапија поради, како што тврди, административни пропусти.

Од СДСМ велат дека проблемите не се ограничени само на дијагностиката и онкологијата. Според нив, дел од клиниките работат со ограничен број операциони сали, медицинска опрема која не функционира постојано и недостиг на медицински персонал.

— реклама —

Од партијата тврдат дека граѓаните се принудени да бараат услуги во различни здравствени установи и да чекаат со месеци за прегледи и дијагностика.

— реклама —

СДСМ го обвини и раководството на Владата за состојбата со водоснабдувањето во Гостивар, наведувајќи дека над 5.000 лица биле погодени од случајот и дека сè уште нема објавени резултати за водата во повеќе од 50 населени места.

Од СДСМ побараа одговорност за состојбите во здравствениот систем и оставка од министерот за здравство Сашо Клековски.