„Не се гордејте со просекот на матурата кога државата останува без деца“, велат од ЛДП

Либерално-демократската партија (ЛДП) преку соопштение реагира на најавата дека во претстојната учебна година ќе има најмалку 3.000 првачиња помалку, оценувајќи дека тоа е најсериозниот показател за состојбата во државата.

— реклама —

Од партијата велат дека изјавата на министерката за образование е „најтешката оценка за политиките на Владата“ и предупредуваат дека намалувањето на бројот на првачиња не е само статистички податок, туку сигнал дека Македонија забрзано се соочува со демографски пад.

— реклама —

Според ЛДП, додека Министерството за образование го истакнува просечниот успех на државната матура како позитивен резултат, суштинското прашање е кој ќе биде дел од образовниот систем во иднина ако секоја година бројот на ученици се намалува.

„Не може да се зборува за успешен образовен систем кога училиштата остануваат без ученици, а младите ја напуштаат државата“, наведуваат од партијата.

— реклама —

ЛДП смета дека демографскиот пад е последица на, како што велат, погрешни политики, економска несигурност, недоверба во институциите и недостиг од визија. Оттаму предупредуваат дека секоја генерација со помал број првачиња значи помалку млади луѓе, помала работна сила и понеповолна перспектива за државата.

Партијата повикува на изработка на национална стратегија за демографска обнова, поголема поддршка за младите и конкретни мерки што ќе создадат услови граѓаните да останат и да ја градат својата иднина во Македонија.