Министерот за внатрешни работи Панче Тошковски предупреди дека семејното и врсничкото насилство бележат загрижувачки раст и порача дека институциите мора навреме да реагираат за да се спречи насилството да се пренесува од домот во училиштата.
Говорејќи на почетокот на проектот „Прекинување на циклусот на насилство – системска превенција на семејно и врсничко насилство преку образовниот систем“, Тошковски истакна дека податоците на Министерството за внатрешни работи укажуваат на сериозно влошување на состојбите во оваа област.
Според него, од 1 јануари до 28 мај годинава биле регистрирани 768 кривични дела поврзани со семејно насилство, што е за 67 проценти повеќе во споредба со истиот период лани, кога биле евидентирани 460 случаи. Само во првите две недели од јуни биле регистрирани уште 89 нови кривични дела.
Тошковски посочи дека МВР годинава поднело 601 кривична пријава, а мерки на кривичен прогон биле преземени против 609 лица.
Осврнувајќи се на врсничкото насилство, министерот информираше дека се регистрирани 93 инциденти во 64 училишта, што претставува зголемување во однос на минатата година.
Особено загрижувачки, според него, е фактот што насилството врз деца е повеќе од двојно зголемено, додека кривичното дело силување на дете под 15 години е евидентирано шест пати, наспроти еден случај во истиот период лани.
„Не смееме да дозволиме насилството од домот да се пресели во училиштата. Тоа мора да се препознае и спречи пред да стане кривично дело“, порача Тошковски.
Тој нагласи дека покрај кривично-правната реакција, клучна е и превенцијата, како и координацијата меѓу полицијата, училиштата и центрите за социјална работа за навремено препознавање на децата кои се изложени на ризик.
Министерот додаде дека МВР ќе продолжи со обуки на полициските службеници за рано препознавање на знаците на семејно насилство, особено во случаи кога жртви или сведоци се деца.
