„Нè урна американската длабока држава“ – Вучиќ со обвинувања по изборниот пораз

Александар Вучиќ го призна поразот на својата коалиција на предвремените парламентарни избори во Србија, но во обраќањето од изборниот штаб на Српската напредна странка упати остри навреди кон новинарите на Н1 и Нова С, ја нападна студентската листа и обвини повеќе европски земји и структури во САД дека учествувале во соборувањето на неговата власт.

„Ова беше потврда на револуцијата што ја спроведоа со директна поддршка од различни европски земји и длабоката американска држава, онаа што е против претседателот Трамп“, изјави Вучиќ.

Тој не приложи докази за тврдењето дека странски држави или делови од американскиот државен апарат го организирале неговиот политички пораз.

Иако им ја честиташе победата на студентите, Вучиќ истовремено ги обвини дека дејствувале во интерес на други политички центри.

— реклама —

„Им честитам, иако тие се само извршители на работи, извршители на валкани работи што некој друг ги осмислил за да урне една суверена земја“, рече тој.

Вучиќ тврдеше и дека новата власт во Србија ќе воведе санкции против Русија најдоцна до март или април, обвинувајќи ги своите политички противници дека за време на изборната кампања ги прикривале вистинските намери. Станува збор за негово предвидување, а не за потврдена одлука или официјална најава на студентската листа.

Најострите навреди во обраќањето ги упати кон телевизиите Н1 и Нова С, чии новинари ги обвини дека ширеле невистини и работеле за туѓи интереси.

„Што се однесува до највалканиот олош од Н1 и Нова С и останатите, секој збор што го изговорија беше лага“, изјави Вучиќ.

— реклама —

Тој повторно го спомена и случајот со наводната употреба на звучно оружје за време на големиот протест во Белград во март 2025 година, обвинувања што претходно ги отфрлаше.

„Еве, сега чекам да ме гонат за звучен топ. Немојте за нешто ситно. Дајте за звучен топ“, рече тој, додавајќи: „Јазикот дури сега ми се разврза. И допрва ќе се разврзе“.

Во обраќањето ја спомена и Наташа Кандиќ, долгогодишна активистка за човекови права и основачка на Фондот за хуманитарно право, која со децении работи на документирање на воените злосторства за време на војните во поранешна Југославија.

„Ѝ честитам на Наташа Кандиќ, нејзината политика победи. Наташа Кандиќ со огромна надворешна поддршка успеа да победи“, изјави Вучиќ.

Кандиќ не беше кандидатка на студентската листа, ниту го предводеше изборното движење. Нејзиното спомнување следува по претходните јавни несогласувања со Вучиќ и неговата партија.

— реклама —

И покрај изборниот пораз, Вучиќ најави дека СНС ќе продолжи со политичкото дејствување од опозиција. Призна дека по губењето на власта од партијата би можеле да се оддалечат одредени бизнисмени, но тврдеше дека партиската организација останува силна и единствена.

„За момент успеавте. До кога? Ќе видиме. Ова го гледав и во 2000 година“, рече Вучиќ, повикувајќи се на политичките случувања што доведоа до падот на Слободан Милошевиќ.

Тој најави дека новата власт ќе има поинаков однос кон Република Српска и Сараево, а политичките противници ги нарече „зло“ кое, според него, неговата партија повторно ќе го победи.

„Ќе го победиме ова зло многу побрзо отколку што мислат“, порача Вучиќ.

Според процените што ги изнесе врз основа на изборен примерок, студентската листа освоила околу 2,2 милиони гласови и би можела да добие меѓу 135 и 140 пратенички мандати, додека неговата коалиција со приближно 1,72 милиони гласови би имала околу 105 пратеници.

Студентското протестно движење се разви по уривањето на натстрешницата на железничката станица во Нови Сад во ноември 2024 година, трагедија во која загинаа 16 лица. Протестите прераснаа во пошироко движење со барања за одговорност, борба против корупцијата и промени во начинот на управување со државата.

По речиси две години протести и политички тензии, Вучиќ го призна изборниот успех на студентите, но продолжи да тврди дека зад нивното дејствување стојат странски интереси.

Конечните изборни резултати треба да ги потврди Републичката изборна комисија на Србија.