„Неколку месеци водиме постапка жими мајка“ – адвокатот на судијата Ристов го нападна обвинението

„Ние веќе неколку месеци водиме постапка на ‘жими мајка’“, изјави адвокатот Ѕвонко Давидовиќ, бранител на обвинетиот судија Ѓоко Ристов, коментирајќи ги доказите на обвинителството и тврдењата за потеклото на парите пронајдени во домот на друго лице.

Давидовиќ беше прашан дали судот треба да му верува на исказот на родинината на Ристов кој кажа дека биле дадени пари, без за тоа да понуди материјален доказ, и дали таквото сведочење може да влијае врз пресудата.

— реклама —

Според него, отсуството на материјален доказ за предавањето пари не би требало да има пресудно влијание, бидејќи, како што тврди, обвинителството од почетокот на постапката се потпира на тврдења што одбраната ги смета за недоволно поткрепени.

„Најдени пари во куќа и ѕид на друго лице, тврди дека се негови, при што вика: ‘Не постои ни еден коруптивен предмет кој јас можам да го кажам и од каде што се земени парите’. Арно ама ние веќе неколку месеци водиме постапка на ‘жими мајка’“, изјави Давидовиќ.

— реклама —

Со ова адвокатот ја оспорува доказната основа на обвинението и начинот на кој обвинителството ги поврзува пронајдените пари со обвинетиот судија. Станува збор за став на одбраната, а не за утврден заклучок на судот.

Давидовиќ одговараше и на прашања за сведоците што одбраната претходно предложила да бидат сослушани, меѓу кои и лице познато по прекарот „Ѓаволот“.

Тој рече дека одбраната сè уште не се откажала од нивното сослушување, но дека има тешкотии да ги обезбеди.

— реклама —

„Не се откажавме сè уште. Размислуваме, затоа што истите не можеме да ги обезбедиме“, изјави адвокатот.

Како пример го посочи Марјан Стојовски, за кого рече дека е хирург и дека повеќепати се обидел да стапи во контакт со него, но без успех поради неговите професионални обврски.

Адвокатот најави дека ќе направат уште еден обид да ги обезбедат сведоците, но не ја исклучи можноста одбраната да се откаже од нивното сослушување за да не се одолжува постапката

„Ќе се обидеме уште еднаш. Ако не, заради економичноста на постапката и да не бидеме обвинети за одолжување, ќе мораме да се откажеме“, рече Давидовиќ.