Немири во една од најголемите германски банки по понудата на „УниКредит“

Вработени во германската банка „Комерцбанк“ денеска протестираа против обидот на италијанската банка „УниКредит“ да ја преземе една од најголемите германски финансиски институции.

Според „Ројтерс“, демонстрантите се собрале пред годишното собрание на акционерите на „Комерцбанк“, носејќи транспаренти со пораки „УниКредит, заминете!“ и „#БезСпојување #БезОрчел“, алудирајќи на извршниот директор на „УниКредит“, Андреа Орчел.

— реклама —

Синдикалниот претставник и член на надзорниот одбор на „Комерцбанк“, Фредерик Вернинг, изјавил дека вработените немаат доверба во плановите на италијанската банка.

— реклама —

„Длабоко сме загрижени дека реализацијата на овие планови ќе биде стратешка грешка, ќе доведе до губење работни места и ќе им наштети на германските мали и средни претпријатија“, изјавил Вернинг.

Организаторите соопштиле дека на протестот присуствувале околу 150 вработени.

— реклама —

„УниКредит“ на почетокот на мај официјално поднесе понуда за преземање на „Комерцбанк“ преку размена на акции, во трансакција вредна околу 35 милијарди евра.

— реклама —

Италијанската банка веќе поседува околу 30 проценти од акциите на германската банка и со новата понуда се обидува дополнително да го зајакне своето влијание.

На преземањето се противи и германската влада, која поседува околу 12 проценти од акциите на „Комерцбанк“, како и раководството на банката.