Пациенти кои се лекуваат на Клиниката за онкологија преку групи на социјалните мрежи реагираат дека во моментов недостигаат неколку клучни терапии што ги примаат во текот на лекувањето.
Според нивните сведоштва, на Клиниката нема Золадекс, Фулвестрант и Ексџева – лекови кои се користат при лекување на одредени видови рак на дојка, особено кај хормонски зависен карцином и кај пациенти со метастази на коските.
Пациентките посочуваат дека Фулвестрантот е терапија која треба да се прима во точно определени временски интервали. Како што посочуваат, и прекинот на терапијата со Золадекс може да има последици.
Во однос на Ексџева, наведуваат дека пократко доцнење не мора веднаш да влијае врз текот на болеста, но подолг прекин може да го зголеми ризикот од компликации.
Според пациентките, од Клиниката за онкологија им било кажано дека недостигот е привремен и дека лековите се очекува да бидат набавени во текот на следните неколку недели.
Став побаравме од директорот на Клиниката за онкологија д-р Игор Стојковски, од кого очекуваме одговори.
