Николоски: Градежништвото има историски највисок раст од 22 %, сигнал дека капиталните проекти се работат со засилена динамика

Градежништвото во второто тримесечје годинава забележало раст од 22 отсто, што според заменик-претседателот на Владата и министер за транспорт Александар Николоски претставува историски највисок квартален раст и показател дека капиталните проекти се реализираат со силна динамика.

— реклама —

Николоски посочи дека растот не е изолиран резултат само за второто тримесечје, туку продолжение на позитивниот тренд што започнал минатата година.

— реклама —

„Се работи за исклучително висок раст, којшто не е феномен само за вториот квартал, туку е континуитет уште од минатата година. Ние во 2024 година ги поставивме темелите, ги поставивме проектите и веќе од 2025 година гледаме силен раст во делот на градежништвото“, изјави Николоски.

Според него, во второто тримесечје биле реализирани градежни работи во вредност од околу 242 милиони евра, што е за околу 22 отсто повеќе во споредба со истиот период минатата година.

— реклама —

Николоски оцени дека градежништвото станува еден од основните двигатели на економијата и најави продолжување на реализацијата на капиталните проекти во наредниот период.

„Навистина градежништвото станува основен двигател на економијата и ќе продолжиме тоа да го правиме во следниот период – да реализираме уште доста бројни проекти коишто ќе значат сериозен раст на градежништвото и со тоа на бруто-домашниот производ“, истакна министерот за транспорт.