Николоски: Македонија самостојно го решава проблемот со транспортерите преку билатерални договори

Македонија самостојно преку билатерални договори го решава проблемот со транспортерите. Веќе имаме такви договори со Швајцарија, Хрватска и Романија, а работиме со Австрија, со Германија и Унгарија. Тоа е систем на ЕУ и тие треба да најдат решение, ние во рамки на можностите на Владата го наоѓаме решението преку овие билатерални договори за долгорочни работни визи, истакна заменик-претседателот на Владата и министер за транспорт Александар Николоски во гостувањето на ТВ Телма.

— реклама —

Тој потенцира дека овие земји се таргетирани како земји каде што македонските превозници најмногу извезуваат или транзитираат.

— реклама —

„Начинот на којшто ние можеме да помогнеме е да склучиме билатерални договори со земјите членки на Шенген-зоната за да се издаваат долгорочни работни визи кои би можеле да ги користат превозниците. Тоа е едното, второто што веќе успеавме да го договориме со Европската комисија е возачите да бидат признати како професионалци и нешто што се случи. Веќе имаме такви договори со Швајцарија, Хрватска и Романија. Во тек е Австрија, работиме со Германија и Унгарија и генерално ова се земјите каде што македонските извозници најчесто одат и онаму каде што најчесто се извезува македонската стока, што значи дека македонските транспортери најчесто патуваат таму“ – рече Николоски.

Тој го потврди ставот на Владата дека секоја држава од Западен Балкан самостојно треба да го решава овој проблем.

— реклама —

„Она што јас во повеќе наврати го кажувам и сега ќе го кажам е дека секоја држава треба да го решава проблемот самостојно и дека не смееме овој проблем да се гледа заеднички, затоа што една е позицијата на Македонија, друга е на останатите држави од Западен Балкан и не мислам дека е паметно овој проблем да се гледа заеднички, туку треба сите држави да го решаваат индивидуално. Ние го решаваме индивидуално, имаме решение и ако другите држави не можат да го решат, тоа е нивни проблем“ – истакна заменик-претседателот на Владата, Николоски.

Тој повтори дека решението треба да дојде од Европската комисија, за што веќе се одржани неколку состаноци и очекува набрзо дека ќе се најде соодветно решение и упати апел до превозниците да не подлегнуваат на странски пропаганди, бидејќи Владата работи на билатерални договори со државите.